Os Planetas encabezan o festival FIV de Vilalba (Lugo), que arrincou este venres con concertos como os da M.Ou.D.A., Miss Cafeína e Depedro e que terá neste sábado a súa xornada grande, na que tamén actuarán Iván Ferreiro e Dorian, entre outros.

A banda granadina liderada por Jota subirase por primeira vez ao Escenario Mahou vilalbés para facer un repaso dalgúns dos temas que xa se converteron en himnos da música indie española.

Chegan ao FIV inmersos na creación do seu novo traballo xunto a El Niño de Elche, ‘Fuerza nueva’, do que xa se publicaron algúns adiantos e que verá a luz o 12 de outubro. Tamén tocarán este sábado La Sonrrisa de Julia e Siloé, Cheese and Bacon DJs e a Banda de Música de Vilalba. Os abonos para as dúas xornadas esgotáronse hai semanas.

O FIV de Vilalba ofrece ademais un programa de actividades paralelas, con formación e gastronomía, así como exposicións, proxección de películas e conferencias abertas ao público, que abordarán desde o IVE cultural á fotografía en festivais.

Na undécima edición do festival, o FIV programou dúas charlas. Este venres a organización proxectou as películas ‘20.000 días en la Tierra’ e o sábado será a quenda de ‘Oasis: Supersonic’.

Nacido en agosto de 2008 da man da comisión das festas patronais de San Ramón e Santa María, o concello fíxose cargo da organización deste festival a partir de 2009.

Nas súas 11 edicións, o festival, que conta cunha zona de acampada de máis de 15.000 metros cadrados, reuniu a preto de 60.000 persoas, co cartel de entradas e abonos esgotados no seu tres últimos anos.