A factoría central de Naturleite, na localidade lucense de Meira, adoptou “medidas extraordinarias” para continuar producindo “a pleno rendemento” e dar cobertura á demanda do mercado durante a actual crise polo coronavirus.
Desde a industria láctea recoñecen aumentar o seu nivel de produción nun 53% nesta última semana e os traballadores están a facer “un esforzo maior ao traballar máis horas das habituais” para sacar adiante os produtos.
Antonio Larrea, director xeral de Naturleite, lembrou este sábado que os gandeiros aos que recolle a compañía seguen “traballando día a día para entregar o seu leite”. “Os seus animais teñen que seguir comendo e sendo ordeñados e a nosa produción non pode parar”, resumiu.
