O número de parados rexistrados nas oficinas de emprego de Galicia descendeu en 6.631 persoas durante o mes de xuño. Este descenso do 3,75 por cento é superior á media do conxunto do Estado, situada no 2,8 –a menor diminución dende 2011 neste mes–. Lugo foi a segunda provincia galega máis dinámica durante o sexto mes de 2018 e a que liderou a caída interanual do paro na comunidade.
En relación con xuño de 2017 hai en Galicia 19.600 parados menos, o que supón unha reducción do 10,33 por cento. Deste xeito, os galegos e galegas sen emprego suman en total 170.065, segundo os datos publicados este martes polo Ministerio de Traballo, Migracións e Seguridade Social.
Observado en perspectiva interanual, isto é, de xuño a xuño, a provincia galega con mellor evolución foi Lugo, pois conseguiu reducir un 12,61 por cento o desemprego. A cifra é superior á de Pontevedra (11,81), Ourense (10,90) e A Coruña (8,11).
Contada dende maio a xuño de 2018, a reducción meirande foi a de Pontevedra, cun 4,83 por cento, ou o que é o mesmo, 3.341 desempregados menos. A continuación Lugo, cun 3,33 (572); A Coruña, cun 3,24 (2.288); e Ourense, co 2,17 por cento (430).
Comparativamente, a diminución do paro en Galicia para o mes de xuño foi a novena máis importante en termos relativos, e a sexta en valores absolutos no conxunto de comunidades de España.
Por sectores, o emprego galego mellorou a súa perspectiva en todos os eidos no mes de xuño. O rexistro favorece especialmente aos servizos, que concentran o groso da caída, con 4.682 parados menos, ou o que é o mesmo, dous de cada tres. O resto provén da construcción, que reduciu o desemprego en 702 persoas, a industria, con 573, e o agro, con 238 persoas menos no rexistro.
Por tipo de contratación, salienta a mellora nos indefinidos: 95.387 acordos foron temporais (+8,45 % mensual e -1,05 % interanual) e 8.283 indefinidos (+0,57 e +14,8). Distribuído por provincias, asináronse un 18,05 por cento máis de contratos en Ourense, un 10,39 máis na Coruña, un 7,45 máis en Lugo, e un 3,82 por cento máis de contratos en Pontevedra.
