Prisión provisional, comunicada e sen fianza para o detido polo atropelo a un organizador da proba ciclista de Cervantes

Cando o ferido tratou de impedir o seu cruce ante o paso do pelotón, o acusado atropelouno causándolle un forte golpe na cabeza, que o mantén na UCI.

Ciclistas na edición de La Vuelta 2019 | La Vuelta - Sarah Meyssonnier

A xuíza do Xulgado de Becerreá decretou este venres prisión provisional, comunicada e sen fianza para o detido polo atropelo supostamente intencionado na proba ciclista celebrada o pasado domingo en Cervantes.

O home está investigado por un delito de tentativa de homicidio, omisión do deber de socorro e condución con desprezo á vida dos demais. O ferido era un dos membros organizadores da proba ciclista Ancares Cycling Marathon.

De acordo cos servizos de emerxencias, o suceso ocorreu sobre as 12.30 horas do mediodía e a vítima resultou con feridas de gravidade, polo que foi mobilizado o helicóptero medicalizado con base en Ourense para trasladalo ao Hospital Universitario Lucus Augusti de Lugo (HULA), onde permanece na UCI.

Os feitos ocorreron nun cruzamento no que o condutor, a pesar da advertencia de Protección Civil, quería atravesar o cordón de seguridade e acceder co coche á estrada que, nese momento, estaba cortada porque ía pasar o pelotón.

Ante a negativa do condutor, a vítima (uno dos organizadores da proba ciclista) saíu dun dos coches de seguridade para tentar impedir que cruzase. Foi nese momento cando o atropelou, tal e como relatan fontes da organización.

O home sufriu un forte golpe na cabeza e foi atendido nun primeiro momento polos servizos médicos da carreira e da PAC de San Román, pero logo tivo que ser derivado en helicóptero ao HULA, onde permanece grave na UCI, segundo informan fontes sanitarias.

DEIXAR UN COMENTARIO

Please enter your comment!
Please enter your name here