Captar a harmonía entre persoas e natureza nos espazos naturais. Ese era o espírito do IV Concurso de Fotografía das Reservas da Biosfera Terras do Miño e os Ancares Lucenses, organizado pola Deputación de Lugo. Os mellores traballos da cuarta edición foron recompensados este mércores con 1.600 euros en premios, nun acto no que participou o deputado de Turismo Eduardo Vidal Baamonte.
O responsable provincial destacou a importancia deste certame para “pór en valor a riqueza do noso patrimonio natural, promovendo o grande patrimonio paisaxístico e ambiental, así como os recursos dos que dispoñen as Reservas da Biosfera Terras do Miño e os Ancares Lucenses”. A achega da Deputación foi de 800 euros para o primeiro premio, 500 para o segundo, e 300 para o terceiro clasificado.
O primeiro premio, de 800 euros, foi para Óscar Doral García, coa súa fotografía titulada Ocaso castrexo. O segundo premio, dotado con 500 euros, foi para Daniel Sánchez Enjuto, por El instante. E o terceiro premio gañouno Antonio José Fernández Hevia, coa súa fotografía A espera.
V edición
Durante o acto de entrega de premios, o Deputado lembrou que a V edición deste certame xa está en marcha. As persoas participantes deberán entregar as imaxes recollidas nun CD e tamén copia en papel fotográfico, dentro dun sobre pechado que inclúa o nome e apelidos do autor/a, data de nacemento, enderezo, teléfono, correo electrónico, título da obra e lugar onde se realizaron. Cada autor/a pode presentar a concurso soamente unha fotografía. As bases completas poden consultarse na web www.deputacionlugo.gal. As tres mellores fotografías recibirán premios en metálico de 800, 500 e 300 euros.
Vidal Baamonde subliñou que nesta edición, “o tema central do concurso son os usos, rituais e actos festivos que constitúen e estruturan os costumes e a vida social. Trátase dunha iniciativa, coa que dende o Goberno promovemos o estudo do territorio, dende unha perspectiva social, ao tempo que da a coñecer a nosa riqueza medioambiental. Estas instantáneas poderán, por exemplo, amosar algunha das múltiples festividades e conmemoracións que se suceden ao longo da xeografía das dúas Reservas da Biosfera e que lembre os valores tradicionais”.
Fotografía para nenos
O Deputado mantivo ademais un encontro cos nenos e nenas que estaban a participar no obradoiro gratuíto A natureza, retratamos flora e fauna no río Rato, que se celebra no Centro de Interpretación Terras do Miño. Son un total de 20 nenos e nenas entre 8 e 10 anos que se achegarán, ata o 7 de xullo, á natureza das reservas e aprenderán a observar e a apreciar a contorna e a súa riqueza paisaxística.
