O Presidente, Darío Campos Conde, detallou este venres o investimento de máis de 129 millóns que o Goberno Provincial achegou nos dous anos e medio que leva á fronte da Deputación aos máis de 300.000 veciños dos 67 Concellos. Campos Conde avanzou que “estes fondos públicos de todos os veciños” no organismo provincial se destinaron á execución de 1.220 obras, á xeración de 1.500 empregos e 10.000 prazas de Teleasistencia gratuíta e Servizo a Domicilio a non dependentes, e a 4.200 axudas en impulso do deporte, turismo e cultura.
O titular provincial explicou a súa distribución por Comarcas, remarcando que “somos unha Deputación coas persoas, sumamente social e rural, que traballa para construír por todos os lucenses ante o desleixo dunha Xunta de Galicia e un Goberno Central inexistentes na nosa provincia”. Segundo precisou, os concellos da Montaña son os segundos maiores beneficiados do investimento da Deputación, só por detrás da Comarca de Lugo, que percibiu 22 millóns para 8 municipios.
Deste xeito, son 23,5 millóns os que o Goberno da Deputación achegou aos veciños dos Concellos da Montaña (Baleira, Baralla, Becerreá, Cervantes, A Fonsagrada, Navia de Suarna, Negueira de Muñiz, As Nogais, Pedrafita do Cebreiro e Ribeira de Piquín). Desta cantidade, 20,5 millóns foron para infraestruturas de toda índole –social, deportiva, cultural, estradas, traídas de auga, rúas, saneamentos, alumeados públicos, etcétera–; 2,5 millóns para o fomento do Estado do Benestar mediante a xeración de 130 novos postos de traballo, 60 prazas de Teleasistencia gratuíta e Servizo a Domicilio a non dependentes e contribuír á atención profesional que ofrecen entidades sociais sen ánimo de lucro; e máis de 550.000 euros á dinamización económica e social mediante o deporte, a cultura e o turismo, colaborando con colectivos en impulso destes sectores.
