O secretario xeral de Infraestruturas, Sergio Vázquez Torrón, asegurou este luns en Lugo que se prevé “dar un impulso importante” ao tramo de Palas de Rei-Arzúa, na autovía que conectará as cidades de Lugo e Santiago.
Vázquez Torrón recoñeceu que é unha autovía “á que lle faltan dous tramos”. “Hai un que vai máis avanzado que outro porque, á parte de problemas con patrimonio, había outras cuestións co contrato que estamos a solucionar, que é o tramo Melide-Arzúa“, precisou. O que vai “máis avanzado e ao que esperamos darlle un impulso importante é o de Palas e Arzúa, ademais aí estamos co viaduto de Pambre que é espectacular”, dixo.
Sergio Vázquez confía que “no 2023” se poida “ter polo menos este tramo finalizado, que se atopa ao 50 por cento”. En canto ao conxunto da autovía, e a súa conclusión, o secretario xeral de Infraestruturas puntualizaba que “ou a finais dese propio ano ou no 2024”.
“Non me gusta tampouco dar un prazo fixo ata que vaiamos solucionando os temas contractuais. En canto estea despexado imos aumentar o ritmo, tamén cos condicionantes ambientais e patrimoniais que temos. Non é unha cuestión orzamentaria”, concluía Sergio Vázquez Torrón.
NOVA GLORIETA
O secretario xeral de Infraestruturas, ademais, anunciou outras actuacións nun acto no que participou xunto á alcaldesa de Lugo, Lara Méndez, e o presidente da Deputación Provincial, José Tomé. No acto tivo lugar a firma do convenio de transmisión dos terreos necesarios para a execución da nova glorieta entre a estrada N-6 e a rúa Alfonso X en Lugo, á que o Goberno destinará medio millón de euros. A firma levouse a cabo no salón de plenos do Concello lucense, coa presenza tamén do delegado do goberno en Galicia entre outros.
En concreto, o Concello de Lugo cede case 500 metros cadrados e a Deputación 371 metros cadrados. Unha actuación que, segundo indicaron, vén de 2011 e quedaba no “esquecemento” ata que se volvía a retomar no ano 2018 por parte do actual Goberno de Pedro Sánchez.
Vázquez Torrón asegurou que “xa non hai desculpa” para acometer estes traballos, “agora temos os terreos e o proxecto e poderase facer unha licitación inminente”, comprometeu.
Ao non ser unha obra de moita “envergadura”, o secretario xeral de Infraestruturas calcula que os traballos “se poden iniciar a finais de ano ou o próximo ano, pero está encarrilada”.
Pola súa banda, a alcaldesa, Lara Méndez, destacou que esa obra vai significar “aliviar o tráfico no Nacional V e sobre todo facer diso unha vía segura que é outro dos obxectivos que nos marcamos”.
