A Garda Civil interceptou a un condutor que triplicou a taxa máxima de alcoholemia permitida despois de circular en zigzag polo termo municipal de Monterroso.
Segundo informou o Instituto Armado, imputou en calidade de investigado un veciño da localidade lucense de Chantada de 34 anos de idade como presunto autor dun delito contra a seguridade viaria.
Supostamente esta persoa investigada circulaba cun turismo pola estrada LU-212 ao seu paso por Monterroso “de forma neglixente, en zigzag”, detalla a Benemérita, polo que foi proposto para sanción por condución neglixente. Ademais, realizáronlle a proba de detección alcohólica, na que obtivo positivo de 0,85 mg/l, que supón máis do triplo da taxa máxima permitida.
Por outra banda, a Garda Civil imputou en calidade de investigado a un veciño de Lugo de 62 anos de idade como presunto autor dun delito contra a seguridade viaria ao superar as taxas establecidas. Na madrugada do día deste domingo na autovía A-6, no termo municipal de Lugo, realizouse proba de detección alcohólica na que obtivo unha taxa de 0,93 mg/l.
As persoas investigadas en relación con estes feitos foron postas a disposición xudicial.
