A alcaldesa do municipio lucense de Monterroso, Rocío Seijas, confirmou que “son 50 os casos activos” dun brote de Covid-19 na súa localidade “e están bastante estabilizados”. “Onte houbo dous casos e antonte non houbo ningún”, abundou.
O municipio Monterroso é un dos concellos da provincia de Lugo que entrará en nivel máximo de restricións a partir do sábado. Eses 50 contaxiados elevan a incidencia a case 1.400 por cada 100.000 habitantes. Todo parece indicar, a pesar das numerosas probas que se están realizando, que está bastante controlado”, reiterou a rexedora sobre este brote de coronavirus.
Este número de positivos está relacionado coas probas PCR realizadas nos municipios entre os máis novos e isto “fixo que empezasen a subir os contagios”. “Fixéronse máis de 500 probas, con cincuenta positivos. Confío en que estea controlado o brote”, insistiu.
Rocío Seijas puntualizou que “todo apunta a que este brote se produciu en reunións privadas, e é que aí non hai o control que hai na hostalaría”. “Todo apunta a reunións privadas”, abundou.
Esta alta incidencia non asusta aos veciños de Monterroso e segundo a alcaldesa a concienciación destes leva a que se respecten “escrupulosamente” as medidas de prevención que marca Sanidade. “A pesar de todo nótase certa normalidade no concello”, concluíu Rocío Seijas sobre unha maior presenza ou non dos veciños polas rúas deste municipio da comarca da Ulloa.
