O condutor do turismo que se deu á fuga o pasado martes tras atropelar a un menor que circulaba en patinete eléctrico entregouse este luns á Policía Local, que abrira unha investigación para identificalo.
O suceso tivo lugar o 27 de outubro, ao redor das 20.25 horas, no cruzamento das rúas Juana la Loca e Camiño Verde, no barrio do Castiñeiro. O accidente produciuse cando xa anoitecera e terminou co menor ferido, aínda que sen lesións de gravidade. O mozo tivo que ser trasladado a un centro hospitalario para recibir atención médica.
Tras o atropelo, o condutor do vehículo non se detivo para auxiliar ao menor e abandonou a zona. As testemuñas que presenciaron o ocorrido facilitaron algúns datos sobre o turismo, que describiron como un coche branco da marca Seat, posiblemente un modelo Ibiza ou León.
A partir desta información, os axentes da Policía Local iniciaron as pescudas para localizar ao responsable e solicitaron as gravacións das cámaras de vixilancia dos establecementos situados nas inmediacións do lugar do accidente, co obxectivo de identificar o vehículo.
Finalmente, o condutor acudiu por iniciativa propia ás dependencias policiais de Sanfiz, onde explicou os motivos polos que abandonara o lugar. Segundo manifestou ante os axentes, marchouse porque “se puxo nervioso” tras o sucedido.
