A presidenta do PP provincial de Lugo, Elena Candia, reivindicou este martes o labor de alcaldes e portavoces populares nunha reunión con dirixentes da zona norte da provincia, na que insistiu nas “supostas irregularidades” do alcalde de Muras, o nacionalista Manuel Requeijo, por “pagar facturas por encima do límite legal para contratos menores a gabinetes xurídicos próximos ao BNG”.
Así o trasladou nun encontro con representantes populares nas comarcas da Terra Chá, Meira e A Mariña, coa que o PP de Lugo pecha un ciclo de reunións de traballo nun curso político, subliñan os populares, “marcado polos escándalos do PSOE coa sucesión de casos de corrupción vinculados ao Goberno de Sánchez e a denuncia ao expresidente da Deputación” José Tomé.
A popular recoñeceu “o traballo diario dos alcaldes para cumprir” cos veciños e veciñas e destacou o labor do PP nos municipios onde “recuperou o goberno” logrando, ademais, “cumprir as súas propostas” como –sinala– é o caso de Viveiro e O Valadouro. Na actualidade, o 65% de poboación da provincia conta cun alcalde ou alcaldesa do Partido Popular. Pero Candia tamén puxo en valor “o papel dos portavoces” nos municipios onde o Partido Popular atópase na oposición.
E como exemplo, aludiu á “constancia” de Eugenia Requeijo no labor de fiscalización ao goberno nacionalista de Muras para detectar, “a pesar das dificultades para acceder á documentación do Concello”, o pago de facturas “por encima do límite establecido legalmente para contratos menores e de forma reiterada a gabinetes xurídicos vinculados ao BNG e Adega, a asociación que leva a Xunta aos xulgados polos parques eólicos”. De feito, lembrou que o PP de Muras presentou denuncia contra o alcalde por suposta prevaricación administrativa continuada.
Os populares cren que “os veciños de Muras teñen que saber que o alcalde leva tempo levantando os reparos de Intervención para abonar facturas por servizos de asesoramento xurídico as empresas vinculadas entre si e con membros do BNG superando o límite legal para contratos menores”.
