A Xunta decidiu suspender a expropiación forzosa de terreos para a construción do eólico Vacaloura, situado entre os municipios Monterroso e Portomarín, á espera de que se resolva sobre a paralización cautelar que realizou o Tribunal Superior de Xustiza de Galicia (TSXG) en 2024 desta instalación por riscos para o medio ambiente.
O Diario Oficial de Galicia (DOG) publica este luns o acordo do Consello da Xunta do pasado 16 de marzo que declarou de utilidade pública deste parque eólico, o que habilita as expropiacións.
Con todo, a Xunta sinala que “non resulta razoable continuar a tramitación do procedemento expropiatorio (privando aos propietarios da súa posesión coa ocupación do ben ou dereito expropiado) cando a promotora non pode executar o proxecto por razón da medida cautelar”. Por tal motivo, as expropiacións quedan suspendidas.
En concreto, estas expropiacións afectarán a máis de 40 propietarios de montes veciñais de Novelúa, Vacaloura de San Miguel de Penas, Narón e Vacaloura e Fido.
Aínda que nun principio o parque estaba proxectado en terreos do centro penal de Monterroso, finalmente o promotor desistiu de incluír esta zona como parte do parque.
