A Policía Local de Lugo detectou a 382 coches que circulaban a máis velocidade da permitida en diferentes puntos da capital lucense.
Segundo trasladou a Policía nunha nota de prensa, ao longo da semana realizáronse máis de 20 dispositivos de control nas rúas Aller Ulloa e San Roque, Rolda da Muralla, Estrada Vella de Santiago, Rolda do Carme, e avenidas Magoi, Infanta Elena, Madrid e Benigno Rivera, controlando a velocidade de máis de 3.000 vehículos.
En concreto, na Rolda do Carme, onde a circulación está limitada a 30 km/h, detectouse a algún vehículo a 79 km/h (sancionado con multa de 500 euros e detracción de 6 puntos do permiso de conducir).
Na Avenida Infanta Elena, limitada a 50 km/h, detectouse a circulación dalgún vehículo a 104 km/h (multado con 600 euros e detracción de 6 puntos do permiso de conducir).
Así mesmo, na Avenida de Madrid, limitada a 50 km/h, detectouse a algún vehículo circulando a 105 km/h (sancionado con multa de 600 euros e detracción de 6 puntos do permiso de conducir).
No caso destes dous últimos vehículos, atopábanse próximos á comisión dun feito delictuoso, tendo en conta que, a partir de 110 km/h en zonas limitadas a 50 km/h, constitúe un delito contra a seguridade viaria, ao exceder en 60 km/h a velocidade máxima establecida.
