O BNG de Lugo arrinca este luns o seu procedemento interno para designar a persoa que liderará a candidatura nas eleccións municipais de maio de 2027. A través dunha asemblea local, a formación nacionalista pon en marcha o mecanismo para que os órganos internos e o conxunto da militancia decidan quen encabezará unha lista que, nos anteriores comicios, estivo liderada polo actual tenente de alcalde, Rubén Arroxo.
O responsable local do Bloque en Lugo, Antón Bao, defendeu a natureza deste proceso cualificándoo de “absolutamente democrático” e de “democracia pura”. Segundo explicou, o obxectivo inmediato é establecer un calendario de traballo que permita unha participación activa da base do partido na toma de decisións. Bao aproveitou a ocasión para contrastar este modelo co doutras forzas políticas, sinalando que a militantes de partidos como o PP “gustaríalles ter a posibilidade de participar democraticamente” deste xeito.
Dende a organización nacionalista amósanse optimistas e aseguran que o BNG “vai a por todas” coa intención de consolidar e ampliar o seu peso no goberno local. Bao reivindicou o papel da formación no liderado da “evolución positiva” que, ao seu xuízo, experimentou a cidade de Lugo nos últimos anos. Con este movemento, o Bloque convértese nunha das primeiras formacións en mover ficha de cara á cita coas urnas de 2027 na capital lucense.
