A edil de Lugo María Reigosa comunicou este luns a súa decisión de abandonar o Grupo Municipal Socialista, o que implica que deixará en minoría ao goberno local formado por PSOE e BNG, e pasar á condición de concelleira non adscrita no Concello lucense.
Reigosa sinalou que se trata dunha “decisión meditada, adoptada tras as discrepancias sostidas na forma de entender e desenvolver o labor municipal” e desde a “convicción” de que, na situación actual, debe exercer a súa responsabilidade “con plena coherencia, independencia de criterio e lealdade ao interese xeral”.
“Seguirei desenvolvendo a miña función con seriedade, respecto institucional e compromiso cos veciños e veciñas de Lugo”, trasladou a concelleira.
María Reigosa confirmou deste xeito a súa ruptura total co goberno municipal, tras dimitir o pasado mes de decembro as súas funcións como responsable local de Medio Rural e, posteriormente, apartarse das filas socialistas.
A pesar de que deixara a militancia do PSOE, Reigosa continuaba formando parte do Grupo Municipal Socialista pero, coa súa decisión deste luns, confirma unha ruptura que xa se escenificou en varios plenos, nos que a concelleira votou algúns asuntos co Partido Popular.
Deste xeito, o goberno bipartito de Lugo queda en minoría, con 12 concelleiros –sete PSOE e cinco BNG–, fronte aos outros 12 cos que conta o PP e a acta de Reigosa, cuxo voto será clave para a gobernabilidade.
Unha situación paralela á que PSOE e BNG afrontan na Deputación de Lugo, onde tras apartarse das filas socialistas pola denuncia contra el por presunto acoso sexual, o expresidente socialista José Tomé e agora non adscrito mantense como clave para a gobernabilidade da institución provincial.
