Unha persoa perdeu a vida na tarde deste venres tras sufrir un grave accidente no municipio lucense de Sarria. O vehículo que conducía precipitouse ao río dende a rúa do Peregrino, unha céntrica vía da localidade, provocando o falecemento do seu ocupante de xeito case instantáneo. Segundo informou o 112 Galicia, o suceso tivo lugar contra as 16.00 horas, momento no que varios particulares que presenciaron a caída deron a voz de alarma ao ver o coche mergullado na auga.

Tras recibir o aviso, o centro de atención ás emerxencias mobilizou de urxencia aos Bombeiros de Sarria, que se encargaron de realizar as complexas tarefas de rescate para recuperar o corpo da persoa do interior do habitáculo. No operativo tamén participaron axentes da Garda Civil, da Policía Local e os profesionais de Urxencias Sanitarias de Galicia-061, que nada puideron facer por salvarlle a vida á vítima. Polo momento descoñécense as causas polas que o condutor perdeu o control do coche nese punto concreto do casco urbano.