A deputada de Cultura Iria Castro e a concelleira de Participación e Servizos á Veciñanza do Concello de Lugo Cristina López achegáronse esta mañá á Facultade de Humanidades, onde convidaron ao estudantado do Grao de Servizos Culturais e do Mestrado de Servizos Culturais a participar das actividades que se celebrarán na cidade arredor dos Premios Mestre Mateo.

Iria Castro e Cristina López participaron nunha clase con estudantes de materias relacionadas coas industrias culturais e os medios audio visuais, con quen compartiron as implicacións da colaboración coa  Academia Galega do Audiovisual para a organización da gala que se celebrará o vindeiro 21 de marzo no Auditorio Fuxan os Ventos.

Destacaron ademais a vontade das dúas institucións – Deputación e Concello- de crear unha programación extendida ao longo de dous meses para promover a implicación da cidadanía nos Premios e socializar a importancia do sector audiovisual.