PSOE e BNG están convencidos de que os orzamentos para 2026, que foron presentados a semana pasada e que teñen un montante total de 131,9 millóns de euros, serán aprobados este venres no pleno extraordinario convocado para ese efecto. Así o trasladaron este martes tras a xunta de Goberno, a portavoz socialista, Ana González Abelleira, e o primeiro tenente de alcalde, Rubén Arroxo. O equipo de Goberno enfróntase o venres a unha situación complicada, xa que unha das concelleiras socialistas podería ausentarse da sesión por motivos de saúde e tampouco está claro o voto da edil María Reigosa, que recentemente abandonou o PSOE. Aínda que asegurou que votaría a favor das contas, recentemente uniuse ao PP na moción sobre unha actuación urxente en Fermín Rivera e na comisión de contas fixo o mesmo para impulsar unha emenda sobre esta mesma cuestión.
A pesar desta situación, Ana González Abelleira confía en que os orzamentos sairán adiante tendo en conta que o proxecto recolle non só as demandas veciñais, senón tamén todas as demandas que se foron aprobando nos distintos plenos. Asegurou que o orzamento é “moi realista” e favorece o futuro de Lugo, polo que non contempla que non sexan apoiados maioritariamente apelando á “responsabilidade que nos compete como concelleiras cos veciños”. González Abelleira referiuse á reunión da comisión de contas afirmando que as emendas non supoñen nin o 1% do orzamento, polo que interpreta que a oposición está de acordo co resto das contas. Sobre a emenda de Fermín Rivera, explicou que a actuación xa está recollida dentro das partidas de abastecemento, polo que non será un “escollo insalvable” para aprobar 131 millóns. Destacou que votar en contra poñería en perigo proxectos como o Plan Novo Norte, o Museo da Romanización ou os investimentos no rural.
Pola súa banda, o nacionalista Rubén Arroxo sinalou que ao Partido Popular resultaríalle moi difícil xustificar un voto en contra duns orzamentos que incorporan “proxectos importantes e necesarios para Lugo”. Ao seu xuízo, unha postura contraria suporía reproducir a estratexia aplicada en Serra de Meira. O tenente de alcalde preguntouse cal sería a explicación do PP se decide rexeitar iniciativas como a climatización da escola infantil de Gregorio Sanz, a renovación da sinalización horizontal ou a reparación de varias rúas demandadas polos veciños. Arroxo engadiu que o PP debe aclarar se a súa intención é deixar sen executar estes proxectos que responden a necesidades reais. Así mesmo, sostivo sobre a débeda que lle atribúe o PP que se a Xunta asumise as súas competencias, o concello tería catro millóns de euros e non habería débeda.
