O Goberno galego acordou, na súa reunión semanal, a aprobación da contratación por un importe de 37.381.352 euros das obras da conversión en autovía do tramo Nadela-A Pobra de San Xiao, ao seu paso polos concellos de Lugo, O Corgo e O Páramo.
O obxectivo é a conversión en autovía do último tramo do corredor Nadela-Sarria (CG-2.2) para completar o desdobramento. A primeira fase dos traballos de desdobramento do corredor en autovía –un total de 9,7 quilómetros entre A Pobra de San Xiao e Sarria– abriuse ao tráfico en novembro do ano 2022, tras investir 25 millóns de euros.
A Consellería de Vivenda e Planificación de Infraestruturas prevé licitar as obras nos días próximos, para poder iniciar a súa execución no ano 2026. Contan cun prazo de execución de 30 meses. As obras que se van a contratar permitirán executar un novo tramo de 13,5 quilómetros de lonxitude, que comeza na glorieta de Nadela e finaliza na ligazón da Pobra de San Xiao, xa en servizo.
