A Xunta liberou, esta fin de semana, na zona dos Ancares un exemplar de voitre negro que foi rescatado en San Froilán (Lugo) e trasladado ao Centro de Recuperación de Fauna Silvestre (CRFS) do Veral para o seu tratamento e rehabilitación. Segundo detallou o Executivo galego nun comunicado, o exemplar, un xuvenil de aproximadamente un ano de vida e 4,5 quilos de peso, estaba moi débil cando foi localizado. Presentaba unha baixa temperatura corporal e unha lixeira deshidratación, pero non tiña nin fracturas nin feridas.
Unha vez no centro de recuperación de fauna, o exemplar “deu rapidamente” mostras de recuperación e ás poucas horas comezou a alimentarse de forma autónoma. No centro de recuperación estivo o tempo “estritamente necesario” para que a súa volta o medio natural se realizase en condicións de subsistir por si mesmo no medio natural. A Xunta, para a súa liberación, tivo en conta tanto as medidas hixiénico-sanitarias para evitar a introdución de enfermidades ou patóxenos no medio natural como as condicións ambientais.
