Un condutor resultou ferido tras envorcar o coche no que circulaba pola estrada LU-530, na cidade de Lugo, e tivo que ser excarcerado ao quedar atrapado, segundo informou o CIAE 112 Galicia. O accidente ocorreu sobre as 7.00 horas deste mércores, no punto quilómetro 6 desa estrada. O 112 recibiu unha chamada alertando de que había un coche envorcado na vía, cuxo condutor estaba atrapado e ferido, aínda que consciente.

A central de Emerxencias avisou aos bombeiros, e a Urxencias Sanitarias-061. Os bombeiros tiveron que empregar medios de excarceración para liberar ao condutor que, tras ser atendido no punto, foi trasladado ao Hospital Lucus Augusti.