O Ministerio de Transportes e Mobilidade Sustentable continúa coa execución das obras de rehabilitación estrutural do pavimento da calzada esquerda da autovía A-6, entre os quilómetros 480 e 540,44 — do Corgo a Guitiriz –, na provincia de Lugo.
Por iso, e para garantir a seguridade dos traballadores e usuarios, desde a mañá deste luns, día 27, e ata o 4 de decembro, producirase o corte total do tráfico na calzada esquerda sentido Madrid, no termo municipal de Lugo.
Segundo traslada o Goberno central, o obxectivo desta iniciativa é “corrixir as deterioracións que presenta o firme, mellorando así a seguridade viaria e a comodidade na circulación”. O orzamento destas obras, concreta, é de “26,42 millóns de euros, IVE incluído”.
En concreto, os cortes de circulación produciranse desde hoxe ata as 24 horas do martes 4 de novembro, entre os quilómetros 491,3 e 494,4. Nesta fase verase afectado a ligazón da A-6 coa LU-530 situado no quilómetro 494 e veranse restrinxidos os movementos de saída de vehículos cara a Lugo e A Fonsagrada e de incorporación de vehículos en dirección Madrid.
Ademais, a partir das 09,00 horas do luns 3 de novembro ata as 24h do xoves 4 de decembro, interromperase o tráfico entre os quilómetros 487,1 e 491,3. Estas obras terán incidencia na ligazón da A-6 en Nadela situado no quilómetro 488 no que se verán restrinxidos os movementos de saída de vehículos cara á A-54 e a N-6 e a incorporación de vehículos desde estas a a A-6 en dirección Madrid.
