O falecemento dunha muller tras ser arroiada por unha vaca durante o desfile de gando de San Froilán, en Lugo, chegou aos xulgados. No número 3, que estaba de garda o día do suceso, abriuse unha investigación sobre o suceso, que tivo lugar o 5 de outubro e que causou a morte dunha moza de 33 anos tras quince días ingresada no HULA.
Segundo confirman fontes do Tribunal Superior de Xustiza de Galicia (TSXG), o xulgado ten aberta unha investigación, como se fai sempre neste tipo de casos. Pola súa banda, a Policía Local xa entregou o seu atestado e agora a Policía Nacional indaga sobre o sucedido para ver se houbo algún tipo de imprudencia no accidente.
Esta mesma semana, o alcalde da cidade, Miguel Fernández, destacou o traballo que realizou o operativo de seguridade durante este evento, que ao seu xuízo actuou “correctamente” e cualificou o ocorrido dun “cúmulo de circunstancias desgraciadas”.
A moza foi arremetida na rúa Bispo Aguirre, tras impactar con ela o animal que fuxía desbocado do desfile que se estaba celebrando na praza maior como parte do programa de festas, concretamente un dos actos máis tradicionais. Foi atendida no lugar do impacto, pero ingresou en estado grave no hospital, onde acabou falecendo quince días despois
O goberno local insistiu en que durante o evento contouse coa presenza de efectivos da Policía Local, Policía Nacional e seguridade privada contratada polo Pazo de Feiras e Congresos, entidade organizadora do acto. “Así mesmo, diversas asociacións colaboraron achegando veterinarios encargados de velar polo benestar animal”, indicou.
Aínda así, o alcalde anunciou tamén posibles modificacións do plan de seguridade para a próxima edición das festas. Ao mesmo tempo, o PP pediu que se constitúa unha comisión de investigación para este accidente e reclamou transparencia sobre os feitos.
