A Confederación Hidrográfica do Miño-Sil (CHMS), organismo autónomo dependente do Ministerio para a Transición Ecolóxica e o Reto Demográfico, finalizou as actuacións de rehabilitación do sistema de saneamento do Cebreiro, no municipio lucense de Pedrafita.
Segundo informou a CHMS, no Cebreiro había un sistema de saneamento de funcionamento unitario que recollía as augas pluviais de escorrentía captadas polas rejillas para mesturalas coas augas residuais. Así, o exceso de caudal en tempo de choiva xeraba un funcionamento incorrecto do sistema de depuración.
Os traballos consistiron na renovación completa da rede de saneamento, así como a canalización e recollida de augas pluviais, da aldea do Cebreiro, evitando deste xeito que gran parte das augas pluviais do núcleo de poboación chegue á estación depuradora de augas residuais do mesmo.
Para iso, renovaron a rede de subministración eléctrica e a iluminación pública, reforzaron a rede de abastecemento de auga e instalaron as canalizacións necesarias para dotar ao núcleo de rede de fibra óptica.
O investimento supera os 700.000 euros, financiados integramente pola Confederación Hidrográfica do Miño-Sil.
ADENDA AO CONVENIO
Así mesmo, a CHMS destacou que a superficie a restituír mediante un novo empedrado que estaba prevista no proxecto actual viuse incrementada durante a execución dos traballos, polo que priorizaron a reposición nas rúas que necesariamente o requirían, ao renovarse as canalizacións dos diferentes servizos nas mesmas.
Por iso, teñen previsto asinar unha adenda ao actual convenio existente entre a Confederación Hidrográfica do Miño-Sil, O.A. e o Concello de Pedrafita do Cebreiro, que incluirá a execución das instalacións accesorias de recollida de augas pluviais de dúas pallozas, así como a renovación das bocas de incendios que serven ás mesmas. O financiamento para estas obras complementarias estímase en 55.000 euro.
