A Policía Local de Lugo denunciou o pasado fin de semana a catro condutores na zona das Gándaras durante unha concentración de vehículos. As infraccións foron condución temeraria ou neglixente, modificación do sistema de escape e por pasar un obstáculo circulando en sentido contrario.
Segundo informa o corpo policial, despregouse un dispositivo específico de vixilancia e control nesta área por parte de diferentes indicativos do Grupo de Operacións Nocturnas en resposta a unha chamada recibida ás 23.30 horas que alertaba desta actividade.
Desde o inicio do servizo e ata aproximadamente as 02.00 horas, engade, os axentes permaneceron na zona supervisando o desenvolvemento da mesma. Sobre a participación, indica que foi “menor que en ocasións anteriores” pero que este feito non impediu que algúns condutores realizasen “comportamentos de risco”.
Por outra banda, a Policía Local denunciou en Lugo a un condutor que chocou co seu coche contra outro turismo estacionado, na rúa Xosé Novo Freire. O home deu positivo en cocaína, benzodiazepinas e anfetaminas, ademais de conducir sen o permiso en vigor ao serlle revogado por unha orde xudicial.
Ademais, no marco de controis preventivos, localizouse a outro condutor “con claros síntomas de estar baixo os efectos do alcol” e que foi denunciado ao non respectar un sinal de semáforo e deterse nunha zona peonil.
