A Policía Local de Lugo interceptou a 90 condutores que superaban o límite máximo de velocidade permitido na vía pola que circulaban. Así o trasladan fontes policiais tras as denuncias realizadas no marco de dispositivos instalados en distintas rúas da cidade.
En canto aos controis de detección de drogas e consumo de alcol, cinco persoas arroxaron resultados positivos en estupefacientes e doce, en alcoholemia. Outro individuo foi detido no seu domicilio por dous presuntos delitos contra a seguridade viaria; un por conducir un vehículo de motor baixo a influencia de bebidas alcohólicas e outro por condución temeraria.
Segundo concretan, dous axentes tiveron que “reaccionar con rapidez para evitar ser atropelados” por este último despois de ordenarlle que detivese a marcha nun dispositivo. A continuación, “iniciouse unha persecución por varias rúas da cidade, durante a cal cometeu numerosas infraccións” e finalizou coa detención do home no seu domicilio.
Así mesmo, dous condutores foron sorprendidos ao volante dos seus vehículos carecendo de permiso de conducir, polo que se instruíron dilixencias por dous delitos contra a seguridade viaria.
