Un equipo de Ateigados da Policía Local de Lugo asistiu na madrugada deste domingo ao condutor dunha furgoneta que estaba durmido no interior do vehículo co motor en marcha parado no carril dereito da Avenida Infanta Elena, na súa confluencia coa rúa Montefaro.
Segundo informaron fontes policiais, os axentes realizaron varios golpes coa man no portelo do vehículo para tentar espertar ao condutor, sen obter resposta. Ante a falta de reacción, procederon a abrir a porta do vehículo para comprobar o seu estado. Nese momento detectaron que o condutor presentaba signos evidentes dunha “forte intoxicación etílica, cun intenso cheiro a alcol, pupilas dilatadas e fala pastosa”.
Así, foi sometido ás probas de alcoholemia, que arroxaron un resultado positivo de 0,83 mg/l, máis do triplo do límite legal permitido. Ante os feitos, instruíronse dilixencias por un presunto delito contra a seguridade viaria e procedeuse á inmovilización do vehículo.
Así mesmo, na rúa Julia Minguillón, os axentes observaron a circulación irregular doutro vehículo. Ao identificar o seu condutor, comprobaron que carecía do permiso de condución, polo que tamén se instruíron dilixencias por un delito contra a seguridade viaria e inmobilizouse o vehículo.
