A maxistrada Sandra María Piñeiro Vilas tomou este xoves posesión como presidenta da Audiencia Provincial de Lugo e membro nato da Sala de Goberno do Tribunal Superior de Xustiza de Galicia (TSXG) nun acto de marcado por un acento feminista.

O acto foi presidido polo presidente do TSXG, José María Gómez y Díaz-Castroverde, así como pola presidenta da Sala do Contencioso-administrativo do TSXG, Dolores Rivera, e o presidente da Sala do Social do alto tribunal, Luís Fernando de Castro.

Ademais, asistiu o vogal territorial de Galicia, José Luís Costa Pillado, e a Sala de Goberno do TSXG, entre outras autoridades xudiciais e civís, como o delegado do Goberno, Pedro Branco; o delegado da Xunta, Javier Arias; o presidente da Deputación, José Tomei, e o alcalde de Lugo, Miguel Fernández.

A nova presidenta foi apadriñada polo maxistrado Xosé Xoán Barreiro Prado e no seu primeiro discurso no cargo destacou a súa condición de muller.

“Supón un paso significativo na consecución da igualdade de xénero e un reforzo das estruturas democráticas e xurídicas”, apuntou, ao tempo fixo mención ás súas predecesoras, María Luisa Sandar e María Josefa Ruíz.

Así mesmo, defendeu a Xustiza como “unha ferramenta de transformación social, unha arma de protección contra a arbitrariedade, un espazo onde todos e todas recibamos a tutela dos nosos dereitos e podamos acceder a unha equidade real, sen distinción de orixe, condición social ou maneira de vivir a nosa identidade”.

Así, subliñou que asume o seu novo cargo coa convicción de que o Servizo Público de Xustiza “non é só unha vocación, senón un compromiso constante cos valores que sosteñen a nosa convivencia democrática”. Ademais, comprometeuse a “pór a Xustiza ao servizo da sociedade, con honestidade, transparencia, independencia e, sobre todo, con humanidade”.

A que ata a data foi a titular do Xulgado de Instrución número 2 de Lugo, despois do seu paso por Marín, presentou e defendeu o catro eixos que definen o proxecto que a levou ata a presidencia.

Neste senido, comezou pola loita contra a violencia de xénero, que definiu como “unha violación grave dos dereitos humanos, dun ataque á liberdade e dignidade das mulleres e dunha forma de discriminación que inhibe gravemente a capacidade da muller de gozar dereitos e liberdades en igualdade co home”.

Por iso, subliñou a importancia de que as vítimas sintan que ao final do proceso xudicial “devolvéuselles a súa dignidade”. Comprometeuse a que “todos os casos de violencia machista reciban a atención, a seriedade e a firmeza que precisan” e defendeu que “a Xustiza está aquí para loitar contra a impunidade, para que as mulleres e as nenas e nenos non teñan que vivir con medo”.

O segundo eixo do programa pasa pola necesidade de ter unha xustiza igualitaria. Por iso, instou a “traballar cada día para garantir que ningunha persoa se vexa en desvantaxe por cuestións de xénero, orixe, condición social ou calquera outra circunstancia que vulnere a súa capacidade de acceder a unha Xustiza equitativa e sen discriminación”.

A nova presidenta da Audiencia Provincial de Lugo tamén insistiu no seu “profundo compromiso coas persoas máis vulnerables”.

Nun discurso escrito integramente en galego, Piñeiro lembrou que o fomentar o uso da lingua galega na Audiencia será crucial, “garantindo que as persoas que opten por falalo non se vexan en desvantaxe”, á vez que avogou por unha Xustiza “próxima e respectuosa coas nosas tradicións e a nosa diversidade lingüística”.

Continuou explicando o cuarto punto do seu programa, que consistirá en ser responsable coa protección do medio ambiente e o benestar animal.

“O sistema xudicial debe ser aliado na defensa do noso planeta, da nosa contorna natural e da biodiversidade que confirma a nosa riqueza”, recalcou. Sobre a protección do benestar animal perfilou que “é unha cuestión de xustiza social”.

LEI DE EFICIENCIA

Sandra Piñeiro analizou a nova Lei de Eficiencia do Servizo Público da Xustiza, afirmando “supón un cambio de paradigma porque transforma profundamente o funcionamento do sistema xudicial, na procura de facelo máis áxil, accesible, transparente e orientado á cidadanía”.

A iso, engadiu que “non é só un cambio administrativo ou técnico, senón tamén cultural, pois redefine a forma en que a Xustiza se percibe e exércese”.

“Estou plenamente convencida de que, a través do traballo en equipo e co apoio de todos os implicados, conseguiremos transformar o sistema xudicial nun servizo máis áxil, moderno e accesible, no que cada cidadán poida confiar para a defensa dos seus dereitos”, afirmou.

Na súa intervención, tamén recalcou o seu propósito de “asumir unha participación activa no órgano de goberno do TSXG para pór especial énfase nas problemáticas e necesidades dos órganos xudiciais de toda a provincia”.

Entre esas necesidades destacou “o necesario seguimento e proposta de aumento da planta xudicial, medidas de apoio e plans para atallar situacións de conxestión”, así como o avance “na implantación das novas tecnoloxías”.

Para finalizar, a nova presidenta da Audiencia Provincial de Lugo lembrou que “o verdadeiro valor da Xustiza reside na forma na que tratamos aos que confían nela, como seres humanos que buscan resolver as súas dificultades coa esperanza de ser escoitados e respectados”.

Completou a súa intervención cun amplo capítulo de agradecementos, entre os que figuraron tanto os persoais como os laborais e institucionais, facendo mención de todos os estamentos da Xustiza, xuíces e maxistrados, letrados, procuradores, funcionarios e corpos de seguridade.

INTERVENCIÓN DO PRESIDENTE DO TSXG

Pola súa banda, o presidente do TSXG pechou o acto cunhas palabras contundentes sobre a elección da nova presidenta, “que é lexítima e adecuada”.

Ademais, sinalou que o acto de toma de posesión “non é unha mera formalidade, senón que expresa o simbolismo esencial do compromiso de xuíces e xuízas co Estado de Dereito e a democracia, así como a vontade de servizo de quen, ademais de exercer funcións xurisdicionais, decidiron asumir responsabilidades gubernativas e institucionais, non en beneficio persoal, senón como servidores públicos ao servizo de quen integramos a carreira xudicial e, o que é máis importante, de toda a cidadanía”.

Sobre Piñeiro, asegurou que conta “con experiencia no manexo de situacións complexas, empatía, cortesía e talante persoal”, á vez que destacou que demostrou que é “unha persoa comprometida coa Xustiza, o Estado de Dereito, o feminismo e a nosa lingua”.

A iso, agregou que “as súas virtudes son a nosa sorte e o brillante futuro desta Audiencia”.