A Policía Local de Lugo detivo a un home por apuñalar cunha navalla a outro, co que discutira previamente e que tivo que ser derivado ao Hospital Universitario Lucus Augusti (HULA).

Segundo o parte de incidencias do corpo municipal, os feitos ocorreron na tarde do luns na Avenida Fábrica da Luz. Unha patrulla foi comisionada pola sala do 092 porque, ao parecer, produciuse unha liorta.

Ao presentarse alí, os axentes comprobaron que había unha ambulancia atendendo a un home que presentaba lesións de arma branca. Este contoulles que as feridas llas había provocado no contexto dunha discusión. O suposto agresor, ao parecer, atopábase nas inmediacións. Cando foi localizado e identificado, alegou que actuara en defensa propia.

Un dos profesionais sanitarios que atendía ao ferido contou á Policía que a arma branca fora lanzada polo presunto agresor a un campo contiguo. Así, os axentes localizárona escondida no tronco dunha palmeira.

A vítima foi trasladada en ambulancia ao HULA cun corte no abdome, mentres que o suposto responsable foi detido por un delito de lesións e foi trasladado a dependencias policiais para a instrución das dilixencias.