A Policía Local acudiu a unha vivenda en Lugo este xoves tras unha chamada dunha muller que manifestaba ser agredida pola súa parella. Unha vez alí, localizaron ás dúas persoas implicadas e constataron signos dunha agresión mutua.
Sinalan nun comunicado que se produciu no contexto dunha “relación conflitiva marcada por problemas de convivencia e consumo de alcol“. Ambas as partes presentaban lesións e recoñeceron manter unha discusión. A muller manifestou que non era a primeira vez que sufría agresións, “aínda que nunca se atreveu a denuncialas”.
Ante esta situación, procedeuse á detención de ambas persoas como presuntas autoras dun delito de malos tratos no ámbito familiar. A muller foi atendida no centro médico e posteriormente trasladada a dependencias policiais. O home, que se negou a recibir asistencia médica, foi igualmente detido.
