O presidente da Deputación de Lugo, José Tomé Roca, xunto ao alcalde de Lugo, Miguel Fernández, visitou este martes a contorna do río Intre afectado pola borrasca Olivier, “que afectou de maneira importante este espazo natural moi utilizado polos veciños”. Alí, o presidente provincial instou á poboación a extremar a precaución na contorna do río e lembrou que, para garantir a seguridade dos usuarios, desviouse o tránsito polo carril bici.

En declaracións aos medios de comunicación, o mandatario provincial detallou que os técnicos da Deputación, en colaboración coa empresa pública Tragsa, están a realizar unha “avaliación exhaustiva” dos danos causados polas intensas choivas rexistradas o pasado venres “para reparar coa máxima celeridade” as consecuencias da treboada.

En concreto, Meteogalicia avisou o pasado venres dunha “situación moi complicada na maior parte da provincia” por “choivas torrenciais” que deixaron máis de 50 incidencias na provincia, coa cidade amurallada como zona máis afectada.

Segundo indicou o CIAE 112 Galicia, no concello lucense rexistráronse 43 intervencións, a maioría delas por alagamentos nas rúas. Ademais, a auga chegou a entrar tamén no anexo ao Pazo dos Deportes.

Deste xeito, Tomei explicou que a Deputación puxo en marcha unha folla de ruta para afrontar esta situación, que inclúe a solicitude dunha actuación de emerxencia á Confederación Hidrográfica e a elaboración dunha memoria técnica para cuantificar os custos das actuacións que serán necesarias.

“Os danos son significativos, hai catro pasarelas peonís que haberá que reparar por completo e no firme do paseo que teremos que acondicionar integramente, e levarán a cabo tarefas de limpeza nas marxes do río“, debullou o presidente da Deputación ante as preguntas dos medios.

Pola súa banda, o alcalde da cidade, Miguel Fernández, aproveitou para destacar a resposta conxunta entre o Concello e a Deputación, e celebrou que “afortunadamente en Lugo non houbo que lamentar ningún tipo de desgrazas persoais”.

“O pasado venres sufrimos unha situación absolutamente extraordinaria e moi desproporcionada que deixou nada menos que 77 litros por metro cadrado, un volume moi importante e moi difícil que calquera sistema de captación poida asumilo en tan pouco tempo”, aseverou.

Con todo, incidiu en que os efectos do cambio climático “son cada vez máis evidentes” e apostou pola prevención, nesta liña, cualificou este episodio como “un golpe de atención” para que todas as administracións prioricen este tema e busquen solucións.

“Estamos a analizar os puntos críticos co obxectivo de aplicar medidas efectivas, como o impulso dun PERTE da auga, que nos permitirá dixitalizar a rede municipal e acceder a datos en tempo real para dar unha resposta máis áxil e eficaz ante futuras emerxencias”, concluíu Fernández.