Adecco publicou este mércores unha oferta de emprego de 100 prazas para labores de panadaría nunha compañía do sector da alimentación de masas conxeladas de Lugo.
Segundo informou o grupo nunha nota de prensa, os seleccionados deberán realizar funcións como a elaboración e o forneado de produtos de panadaría; o amasado, a fermentación e o envasado dos alimentos finais.
Nesta liña, apunta Adecco, para acceder a estes postos é necesario contar con dispoñibilidade horaria, capacidade de desprazamento pola cidade e os seus arredores, Lugo, Outeiro de Rei e Begonte e viabilidade para incorporarse este mes de abril. A empresa ofrece un contrato temporal con posibilidade de incorporación e promoción na empresa, así como acompañamento durante as primeiras semanas e formación continua.
