A Garda Civil detivo a cinco persoas como presuntas autoras dun delito de roubo de cable de cobre na provincia de Lugo. Tal como informou a Benemérita, foi o pasado 22 de xaneiro cando os axentes tiveron coñecemento de que nunha paraxe situada nas inmediacións de San Vitorio de Ribas, no Saviñao, atopábanse 10 rolos de cable de cobre de distintos grosores ocultos entre a maleza. Por iso, comezou unha investigación ante a sospeita de que os autores depositarían alí o material subtraído de forma temporal coa presunta finalidade de retiralo proximamente.
Así, o 27 de febreiro detectouse a presenza dun furgón que transportaba 1.200 quilos de cable de cobre, material coincidente co que se atopaba oculto na maleza, procedéndose á detención de dous cidadáns romaneses. A investigación policial culminou este martes, día 4 de marzo, coa detención doutros tres cidadáns romaneses, residentes temporalmente en Taboada, como supostos autores dun delito de roubo de cable de cobre. Os detidos foron postos a disposición do Xulgado de Instrución de garda de Monforte de Lemos.
