A exposición itinerante que conmemora o 25.º aniversario da inclusión do Camiño Francés no Patrimonio Mundial da Unesco trasládase a Lugo, antes de visitar Palas de Rei e Sarria. Organizada pola Consellería de Cultura e Turismo e procedente do concello lucense de Portomarín, onde pechou as portas o domingo, a mostra fotográfica realiza unha retrospectiva sobre este fito que, no contexto do Xacobeo 93, supuxo “un punto de inflexión” na peregrinación a Compostela.
Nas vindeiras semanas, a mostra itinerante poderá visitarse na cidade de Lugo, na Delegación Territorial da Xunta. A continuación, o conxunto das fotografías será trasladado ata Palas de Rei. Sarria será o cuarto municipio que recibirá esta exposición, na que foron invitados a participar todos os concellos desta Ruta Xacobea. A mostra púidose contemplar por primeira vez no Centro Galego de Arte Contemporáneo (CGAC) o pasado mes de decembro, coincidindo co acto conmemorativo deste aniversario.
A vía Künig, un debate pendente
O conselleiro de Cultura, Román Rodríguez, mantivo unha xuntanza cos alcaldes da Mancomunidade de Concellos Galegos do Camiño Francés, para anunciar unha “intensa colaboración” por parte do goberno autonómico durante o 2019 coa vista posta no Xacobeo 21, eixo programático do executivo de Alberto Núñez Feijóo. Así as cousas, a Mancomunidade, a Sociedade de Xestión do Xacobeo e a Xunta teñen opinións dispares sobre a incorporación de variantes ao trazado oficial do Camiño de Santiago.
Logo de ser preguntado pola ruta alternativa por Muros e Noia, o responsable do departamento de Cultura explicou que toda consideración pasa pola “base histórica e cultural”, interesante perspectiva para a Vía Künig. Esta variante do Camiño Francés vira por Pedrafita cara As Nogais, Becerreá, Baralla e O Corgo, para pasar pola cidade de Lugo.
A vía, actualmente baixo investigación e avalada pola Xunta en tempos de Manuel Fraga, conta con abundante evidencia documental. Toma o nome da guía homónima do século XV, escrita polo monxe alemán Künig, e editada en cinco ocasións entre 1495 e 1521.
Gómez Vila: “Non hai ningunha montaxe, a Vía Künig funcionou na Idade Media”
