A festa de recreación histórica Arde Lucus celebrará a súa próxima edición, a XXIV, do 12 ao 15 de xuño, segundo anunciou este xoves a alcaldesa de Lugo, Paula Alvarellos.
A data foi elixida por unanimidade polas 19 asociacións implicadas na súa organización, polo que non coincidirá con San Xoán nin co Corpus, dúas datas que se tentan evitar todos os anos.
Na mesma reunión na que se decidiu a data, fíxose un balance da pasada edición, na que se certificou unha ocupación hoteleira do 100% e o maior número de visitantes ata agora.
Esta festa foi declarada de Interese Turístico Internacional en 2023 e é unha das máis asentadas no programa cultural anual da cidade. O concelleiro responsable da área de Xuventude, organizadora do evento, Jorge Bustos, asegurou que o obxectivo para 2025 será “centrar os nosos esforzos en mellorar a calidade da programación”.
As asociacións participantes no Arde Lucus son Ara Roma, Asemblearias Lucus Augusti, Caetra Lucensium, Civitas Lucensis, Clan de Breogán, Cohors III Lucensium, Garda Pretoriana, Kertix, Lucus Equites, Lucus Icenas Miliatore, Lugdunum, Mercenarios Galaicos, Pax Romana, Salesiani Luci Augusti, Senatus Lucus Augusti, Terra Copora, Tir Na n’Og, Trebas Galaicas e Vestales Lucus Augusti.
