A condecorada artista multidisciplinar, Luz Darriba, autora do proxecto ‘Cumulum’, pedra angular da candidatura da muralla de Lugo para a súa declaración como Patrimonio da Humanidade pola UNESCO no ano 2000, será a pregoeira das festas de San Froilán 2024.
Así o anunciou este venres, no marco da reunión da comisión de festas do evento, a concelleira de Cultura, Turismo e Promoción dá Lingua do Concello de Lugo, Maite Ferreiro, que revelou tamén que outras dúas mulleres artistas, a dramaturga Ana Carreira e a deseñadora de vestiario Marga Portomeñe, encabezarán a Ofrenda a Rosalía de Castro.
“Trátase de tres mulleres representantes da importancia de Lugo na actualidade para a cultura galega que terán un protagonismo especial nas nosas festas de San Froilán”, sintetizou, en relación ao anuncio, a edila nacionalista.
Luz Darriba, artista nada en Uruguai, formada en Arxentina e de quen Ferreiro destacou “a súa longa traxectoria profesional” e a súa contribución co proxecto ‘Cumulum’ á consecución dun “fito histórico” para a cidade, será a encargada de dar inicio ás festas coa lectura do pregón coincidindo co 25 aniversario da súa lembrada intervención artística.
Un proxecto, consistente na instalación de 650.000 libros ao redor da Muralla Romana de Lugo no que chegaron a participar preto de 5.000 persoas, que continúa sendo considerado aínda hoxe, recalcou a concelleira de Cultura, como “unha das intervencións artísticas máis relevantes da historia de Lugo”.
O outro dos eventos destacados a nivel institucional da celebración das festas patronais, a ofrenda a Rosalía de Castro que se celebrará o coñecido como ‘Domingo das Mozas‘, correrá a cargo da dramaturga, narradora oral e actriz, Ana Carreira, e da tamén actriz, Marga Portomeñe, coñecida ademais polo seu labor docente e polo seu traballo como deseñadora de vestiario e especialista en restauración e construción de xigantes e cabezudos.
