O programa de rutas fluviais en catamarán polos ríos Miño e Sil superarán en decembro os 30.000 viaxeiros, segundo as estimacións da Deputación de Lugo, avanzadas polo deputado de Promoción Económica e Social, Pablo Rivera, ao termo da reunión ordinaria da Xunta de Goberno da institución provincial.
Rivera, que cualificou como “exitoso” o balance estival dos paseos fluviais pola Ribeira Sacra, que suman ata o momento, entre a ruta que parte do embarcadoiro de Ponche do Sil, en Monforte de Lemos, e a ofertada desde o embarcadoiro de Belesar, entre O Saviñao e Chantada, “máis de 21.000 viaxes contabilizadas”, sinalou que existen 10.500 reservas máis realizadas xa para o que resta de tempada.
“O que supoñen estas reservas é que superemos as 30.000 viaxes en catamarán, os 30.000 visitantes que van gozar este ano tanto do Cabo do Mundo como dos canóns do Sil e iso é algo que demostra que o turismo nesta provincia funciona e que se está facendo un gran labor en materia turística desde esta institución”, destacou.
En relación aos acordos alcanzados este venres na reunión ordinaria da Xunta de Goberno, o deputado de Promoción Económica e Social anunciou a adxudicación da renovación do contrato do servizo para a protección contra incendios dos edificios de titularidade provincial por valor de “máis de 100.000 euros“.
Tamén informou Pablo Rivera durante a súa comparecencia ante os medios da aprobación da convocatoria e das bases para a contratación dun enxeñeiro técnico de obras públicas para “profundar”, indicou, en “o servizo de vías e obras” e seguir traballando, finalizou, na “mellora das estradas provinciais”.
