A Xunta de Galicia e o Concello de Outeiro de Rei avanzan no proxecto para construír unha nova estación depuradora de augas residuais (EDAR) no municipio para mellorar o servizo que se presta á veciñanza.
Nunha reunión que mantiveron este venres a conselleira de Medio Ambiente e Cambio Climático, Anxos Vázquez, comunicoulle ao alcalde da localidade, José Prado, que está previsto que Augas de Galicia adxudique nas próximas semanas o contrato para o servizo de redacción do proxecto construtivo da nova EDAR, cun orzamento inicial estimado de máis de 240.000 euros.
Segundo informou a Xunta, ese contrato inclúe tamén a mellora dos colectores xerais co obxectivo de dar solución ao problema das infiltracións de augas limpas na rede de saneamento municipal.
