Galicia estará representada na vindeira edición do Campus Mundial sobre o cambio climático por un centro de ensino lucense, o CPR Plurilingüe Cervantes de Lugo. O colexio sito na rúa Camiño de Pipin acadou a presenza no magno evento, a celebrar en Costa Rica en abril de 2019, mercé a un proxecto de educación ambiental.

Este traballo causara fondo impacto nos participantes do Campus celebrado en Aveiro en setembro, sendo o CPR Cervantes o único centro de primaria en participar do encontro. Aquela experiencia foi a orixe da participación no Campus Mundial de Costa Rica, ao que viaxarán catro alumnos participantes da iniciativa.

Os gastos da viaxe os asumirá a Consellería de Medio Ambiente, Territorio e Vivenda, como comunicou a responsable do departamento, Ángeles Vázquez, na visita ás instalacións do centro de ensinanza infantil e primaria.

O proxecto consistiu na elaboración dun vídeo para sensibilizar sobre a necesidade de manter unha posición activa e pór en marcha medidas que mitiguen o cambio climático. A conselleira destacou o esforzo dos alumnos por trasladar unha mensaxe importante, dun xeito ameno e sinxelo pero moi directo, como “coidar o planeta, o paciente global da sociedade”, poñendo o foco na necesidade de actuar con urxencia.

A conselleira indicou que este traballo foi recoñecido coa máxima puntuación por un comité científico avaliador, que permitiu aos rapaces do CPR Cervantes participar no Campus de Aveiro, a pesares de que non era un encontro pensado para estudantes de primaria. A experiencia que vivirán en Costas Rica é un premio ao traballo e a dedicación prol da conservación do medio ambiente, referencia para toda a comunidade escolar e educativa de Galicia.

Un plan de estudos “verde”

Vázquez salientou o grao de implicación do plan de estudos do CPR Cervantes coa responsabilidade social, centrado especialmente no coñecemento dos dereitos humanos e o respecto ao medio ambiente e á natureza. “Un plan de estudos verde sobre a ecoloxía e o medio ambiente fomenta a educación ambiental dende os primeiros anos de escolaridade”.

Este contacto directo coa loita contra o cambio climático e o que cada persoa pode facer no seu día a día; co fomento por un consumo eficiente e eficaz da enerxía, tanto no centro educativo como nas vosas casas, adquirindo coñecementos sobre as enerxías limpas e os seus múltiples beneficios; a biodiversidade e o amplo patrimonio natural co que conta Galicia, e sobretodo aprender a conservalo e a protexelo; e a xestión dos residuos que se xeran cada día, sendo conscientes da cantidade diaria que cada un de nós produce e como se pode reducir, así como reutilizalos e reciclalos.