O pleno do consorcio provincial de bombeiros de Lugo aprobou un orzamento para 2024 que contará con 5,8 millóns de euros, o que supón un 2,65 % máis que o actual exercicio. Nun comunicado, a Deputación de Lugo informa de que achegará o 50 % do orzamento do servizo contra incendios e salvamento (da outra metade do financiamento faise cargo a Xunta), que abarca os parques de bombeiros de Monforte de Lemos, Chantada, Sarria, Barreiros, Vilalba e Viveiro.
O presidente da Deputación e do consorcio provincial, José Tomé, presidiu o pleno desta entidade para aprobar as contas. Do total de 5,8 millóns, haberá 4,6 millóns destinados a facer fronte aos salarios dos traballadores. Mentres, resérvanse 944.100 euros a gastos correntes. Tamén haberá 140.000 euros ao fondo de continxencia e preto de 31.000 euros para investimentos.
