O Vello Cárcere de Lugo acolle este xoves e venres unha conferencia europea de alto nivel sobre envellecemento e despoboamento na que participará a comisaria de Democracia e Demografía da Unión Europea, Dubravka Suica, así como o ministro de Exteriores en funcións, José Manuel Albares. A cita arrincará na tarde do xoves coa inauguración, na que, ademais da comisaria europea e o ministro participará o presidente da Deputación de Lugo, José Tomé, e a alcaldesa da cidade, Lara Méndez.
Diso informou a institución provincial nun comunicado, no que destaca que no encontro, organizado con motivo da Presidencia Española do Consello da Unión Europea, debateranse e tomarán decisións para o coidado das persoas maiores en Europa e tamén para á cohesión territorial e a loita contra o despoboamento.
Tras a inauguración na tarde do xoves, na mañá do venres desenvolveranse dous paneis técnicos. O primeiro será Envellecemento, lonxevidade e demografía na Axenda Europea, que arrincará ás 10.00 horas e que contará coa participación de Miguel Ángel Cabra Luna, Conselleiro do Comité Económico e Social Europeo en representación de CEPES (Confederación Empresarial Española da Economía Social). Ademais, estarán a presidenta da Federación de Asociacións de Mulleres Rurais (Fademur) de Galicia, Verónica Marcos; a presidenta desta entidade en España, Teresa López; e o coordinador do Centro Internacional sobre o Envellecemento (CENIE) da Universidade de Salamanca, Juan Martín.
O segundo, previsto a partir das 11.00 horas, será o de Economía prateada e a problemática asistencial dos maiores, e contará coa participación do deputado provincial de Promoción Económica e Social, Pablo Rivera Capón; o director do Instituto de Maiores e Servizos Sociais (IMSERSO), Luís Alberto Barriga; o presidente da Sociedade Española de Xeriatría e Xerontoloxía (SEGG), José Augusto García; o director Médico e de Calidade de Sanitas Maiores, David Curto, e a concelleira de Inclusión, Benestar Social e Persoas Maiores de Lugo, Olga López.
Ademais, segundo sinalou a Deputación de Lugo, despois dos paneis haberá conclusións e clausurará o evento o secretario de Estado para a Unión Europea, Pascual Navarro. O presidente da institución provincial, José Tomé, destacou que a conferencia “evidencia a importancia que ten a provincia para o Goberno central, pondo a Lugo no eixo de debate destes temas de gran relevancia como son o reto demográfico e o envellecemento da poboación“, apuntou.
“Ademais, os colectivos lucenses terán un papel protagonista nos foros, o que de seguro será moi proveitoso para o noso territorio”, sinalou o mandatario provincial. A Deputación tamén intervirá nun dos paneis para falar sobre as políticas sociais polas que aposta a institución provincial e incidirá no seu modelo de residencias.
