Ana Sandamil, condenada polo asasinato da súa filla Desirée, de sete anos, na parroquia de Muimenta, en Cospeito, en maio de 2019, recorrerá ao Tribunal Supremo a súa condena á prisión permanente revisable.
Así o confirmaron a Europa Press fontes próximas ao caso, que aludiron á “vontade” formulada a este respecto pola acusada e a familia. “A cuestión é se se aplica ou non algún tipo de eximente“, engadiron as mesmas fontes en relación, polo menos, á incompleta.
Este recurso será despois de que o Tribunal Superior de Xustiza de Galicia (TSXG) confirmase a condena a prisión permanente revisable imposta pola Audiencia Provincial de Lugo tras desestimar o recurso de apelación presentado pola procesada contra este fallo, que se ditou de acordo co veredicto de culpabilidade do xurado popular.
Na sentenza, a Audiencia concluíu que a muller actuara esa noite coa finalidade de acabar coa vida da súa filla, fornecéndolle un fármaco con efectos sedantes mentres durmían xuntas na mesma cama e, posteriormente, asfixiándoa “coas súas propias mans” e con algún dos obxectos que se localizaron na habitación con restos biolóxicos tanto da nai como da nena.
ALEIVOSÍA E PARENTESCO
Segundo a sentenza, un dos feitos que puideron influír no crime foi que Sandamil era “coñecedora da intención do pai de modificar e incrementar legalmente o réxime de visitas, co fin de que puidesen pasar máis tempo xuntos”. “Resulta innegable que deu morte á súa filla actuando con aleivosía, e iso implica a comisión dun delito de asasinato coa agravante de parentesco”, indican os maxistrados do TSXG, á vez que recalcan que “as posibilidades defensivas da menor eran inexistentes“.
En canto a unha das partes centrais do caso, a determinación das súas facultades estaban afectadas, o TSXG destaca que o tribunal do xurado fundamentou a súa conclusión “nas probas forenses e de criminalística”.
