En Lugo, o tenente de alcaldesa de Transición Ecolóxica, Miguel Fernández explicou que polo momento “non foi decretada ningunha prealerta ou alerta de seca”.
Con todo, desde o Concello actuaron “coa máxima responsabilidade” coa aplicación de diversas pautas que “contribuirán a garantir” a calidade dos servizos públicos sendo conscientes da limitación dos recursos e usándoos “de forma eficiente pero tamén comedida”.
Desta forma, detallou que desde este xoves utilizarán un 30% menos de auga para a conservación dos xardíns e priorizarán “os máis sensibles” e os que teñan plantada flor de tempada.
No referente á limpeza viaria sinalou que o servizo municipal encargado destes traballos reducirá o baldeo nun 50%. Esta porcentaxe, se a situación empeora, rebaixarano nas dúas prestacións ata un 75% e mesmo un 90% no caso de que a Confederación Hidrográfica así o determine.
