O PP nomeou este xoves outro tres deputados provinciais para o pleno da Deputación de Lugo. Trátase dos alcaldes de Xove e Riotorto, Demetrio Salgueiro e Clemente Iglesias, respectivamente, e do seu portavoz municipal en Trabada, José María Fernández.
Trátase dos tres representantes que corresponden aos populares polo partido xudicial de Mondoñedo, despois de que este mesmo xoves fose elixido o alcalde de Cospeito, Armando Castosa, como deputado pola demarcación de Vilalba.
O mércores, o PP lucense tamén facía público os seis deputados que lle corresponden polo partido xudicial da capital: Carmen José López (portavoz do PP en Sarria), Antonio Ameijide (edil en Lugo); e os rexedores José Pardo Lombao (Outeiro de Rei) Francisco Javier Balado (Castro de Rei), José Ángel Santos (Friol) e Jesús Manuel Núñez (As Nogais). Suplentes serán Héctor Corujo (O Incio), Olga Igrexas (Triacastela) e María José Gómez (Guntín).
Ademais, os rexedores do Incio e Triacastela está previsto que se incorporen ao longo do mandato, rotando con Carmen José López e Jesús Manuel Núñez. A nova corporación da Deputación de Lugo constituirase o próximo 30 de xuño e espérase que volva ser elixido presidente o socialista José Tomé, quen gobernou os últimos catro anos en coalición co BNG.
