A Policía Local de Lugo tramitou varias denuncias contra establecementos hostaleiros por diversas infraccións da normativa de espectáculos públicos, no marco dunha inspección realizada o pasado fin de semana.

Segundo informaron fontes policiais, levantáronse varias actas de denuncia nun local da rúa Mariña Española. Así, os axentes detectaron o funcionamento inadecuado dun equipo de música, que non interrompía a emisión a pesar de estar en niveis moi altos de volume, chegando a rexistrar 107 decibeis; tamén se detectou carencia de información relativa ao horario de apertura e peche, e relativa ao aforamento máximo do local, que tampouco tiña copia da licenza municipal. A iso súmase que o establecemento tiña instalada unha cámara de videovixilancia sen o preceptivo cartel informativo.

Tamén se interpuxo denuncia contra un local da rúa Concepción Arenal ao comprobarse que, a pesar de ser un café bar e ter prohibida a instalación de equipo musical, estaba a reproducir música desde un computador conectado a un altofalante, de maneira que o son percibíase mesmo desde o exterior.

Por outra banda, tamén se levantou acta de denuncia por infracción da lei de seguridade cidadá a unha persoa relacionada cun dos establecementos inspeccionados, que se negou a identificarse ante os axentes.