A Policía Nacional de Lugo detivo a un home de 19 anos pola agresión a un mozo na praza do Campo de Lugo que tivo que ser atendido de urxencia debido á gravidade das lesións que tiña nun ollo.
A Policía recibiu unha chamada ao 091 na madrugada do pasado sábado que alertaba destes feitos, e dirixíronse inmediatamente á zona de lecer da Praza do Campo, onde observan como un mozo está no chan ferido de gravidade.
Alí, prestáronselle os primeiros auxilios, á vez que se solicitou a presenza dunha ambulancia, que o traslada de inmediato ao Hospital Universitario Lucus Augusti (HULA) debido á gravidade das feridas que presentaba, principalmente nun dos seus ollos.
En compañía da vítima estaban varias testemuñas que relataron ás autoridades que varios mozos, dous homes e unha muller, foran os autores da agresión á vítima, así como a outro que tratou de impedila. Este outro individuo estaba tamén no lugar dos feitos, presentando feridas de menor consideración.
Cos datos achegados polas testemuñas, a Policía Nacional de Lugo estableceu un dispositivo co obxectivo de dar cos presuntos agresores.
As autoridades interceptaron minutos máis tarde a dous individuos cuxas características coinciden cos agresores e procederon á detención e traslado a dependencias policiais dun deles, un home de 19 anos.
Mentres, o segundo detido, menor de idade, foi trasladado á comisaría para a súa identificación e é entregado posteriormente aos seus titores legais.
