A empresa Altri remitiu unha solicitude á Xunta para a concesión dunha captación de auga do río Ulla no termo municipal de Agolada orientada a abastecer a fábrica de fibras téxtiles que a compañía portuguesa proxectou no concello lugués de Palas de Rei.
Diso informou a Administración autonómica nun comunicado no que anuncia a apertura do trámite de competencia de proxectos para as entidades interesadas en formular propostas de aproveitamento alternativas.
En concreto, Altri pide a captación de augas superficiais cun caudal máximo de 535 litros por segundo procedentes do encoro de Portodemouros, situado entre as provincias da Coruña e Pontevedra.
A petición da compañía lusa, ligada ao desenvolvemento do seu proxecto industrial en Palas de Rei pendente de concretarse, motivou a apertura deste procedemento por parte de Augas de Galicia –ente dependente da Xunta–, ao que está obrigado por lei.
Unha vez pechado o prazo de presentación, os proxectos deberán ser avaliados. Segundo resalta a Administración autonómica, quedarán excluídos aqueles que “contravengan o establecido” no Plan Hidrolóxico Galicia-Costa, conca na que se encadra o río Ulla e o encoro de Portodemouros.
Os que superen este corte serán sometidos ao procedemento de avaliación ambiental, ademais do proceso de información pública. Pola súa banda, os organismos e concellos afectados tamén deberán emitir os informes perceptivos.
A Xunta afirma que a concesión carrexaría “un conxunto de condicións” a cumprir polo responsable.
