Os votos dos grupos que conforman o goberno da Deputación de Lugo –PSOE e BNG– bastaron para que os orzamentos da institución para 2023 saísen adiante este martes coa única oposición do PP.
As contas da deputación que encabeza o socialista José Tomei ascenden a 110 millóns, dos que 21,5 millóns destínanse ao Plan Único, a través do cal se reparten partidas orzamentarias aos 67 concellos da provincia de Lugo.
Antes de entrar a pleno, o presidente lugués e alcalde de Monforte resaltou dos de 2023 son “os orzamentos máis elevados do mandato e van seguir dando resposta na liña de traballo que seguiu este goberno durante este catro anos para o conxunto da provincia de Lugo”.
Os socios de goberno, o BNG, a través da vicepresidenta da institución, Maite Ferreiro, coincidiron en apuntar a liña continuista dos orzamentos para o próximo exercicio, no que se celebrarán eleccións municipais.
“Son uns orzamentos bos xa polo feito de que se vaian aprobando a tempo e este ano novo os concellos poderán dispor dunha cantidade para saber como enfrontarse a facer obras”, incidiu Ferreiro, que subliñou que se trata dunhas contas “moi adaptadas á realidade”.
Pola súa banda, o portavoz do PP, Javier Castiñeira, criticou o que considera uns “malos orzamentos”. “Non se subiu aos concellos e están encabuxados. Gran parte están encabuxados polo sectarismo á hora de recibir recursos”, incidiu.
Do Plan Único, Castiñeira asegurou que é “insuficiente”. “Ten un millón e medio máis que o ano 2017 cando se fixo, cando os orzamentos teñen 25 millóns máis que en 2017”, apostilou.
