Dúas persoas tiveron que ser trasladadas ao resultar feridas nun accidente entre dous coches ocorrido nunha rotonda da cidade de Lugo. Ao parecer, un deles circulaba en dirección contraria, pero as causas aínda se están investigando.

Segundo informan a Europa Press fontes do 112 Galicia e dos servizos intervenientes, ocorreu pasadas as 12,30 horas deste xoves na glorieta da Rúa Serra de Meira.

Por causas que aínda se descoñecen e nas que indaga a Policía Local, un dos turismos implicados circulaba en dirección contraria pola rotonda e impactou contra o outro.

Como consecuencia do choque, dúas persoas resultaron feridas, pero estaban “conscientes e accesibles”, segundo trasladou o 112 Galicia. A chamada de alerta á central de emerxencias dábaa o 061, dado que os servizos sanitarios xa se atopaban no lugar cunha ambulancia que se encargou de trasladalas ao Hospital Universitario Lucus Augusti (HULA).

Seguidamente, o 112 alertou á Policía Local de Lugo e aos bombeiros, que non chegaron a intervir porque non era necesario efectuar ningunha excarceración.