A Sección Segunda da Audiencia Provincial de Lugo xulga desde o vindeiro mércores día 2, ás 10,00 horas, a un home acusado de agredir sexualmente a unha muller en Lugo en novembro do ano 2019. A Fiscalía pide para el cinco anos de prisión.
Segundo relata o Ministerio Fiscal, os feitos ocorreron o 11 de novembro de 2019. Esa noite, a vítima xunto cunha amiga estivo en varios locais de lecer da cidade. Ás 03,30 horas, continúa o escrito fiscal, saíron do local e sentaron nun portal, onde viron o procesado en compañía de varios amigos.
A partir de aí, o acusado e a vítima desprazáronse ata a Praza de España e, posteriormente, nun portal da Praza Campo Castelo, “sen que conste o emprego de violencia ou intimidación e sen mediar o consentimento dela”, “dado que tiña moi diminuída a súa capacidade volitiva e intelectiva, debido ao seu estado de intoxicación etílica”, o procesado, “aproveitándose da súa situación”, mantivo unha relación sexual con ela.
Días despois, en concreto, o 13 de novembro, estes feitos foron denunciados pola muller tras recibir asistencia sanitaria no Hospital Universitario Lucus Augusti de Lugo.
Ademais, o escrito de Fiscalía destaca que como consecuencia do ocorrido, a vítima sofre sintomatología ansiosa e depresiva, así como trastorno de tensión postraumática, polo que se ve obrigada a recibir terapia psicolóxica.
Por estes feitos, constitutivos dun delito de abuso sexual con acceso carnal, a Fiscalía demanda impor ao procesado a pena de cinco anos de cárcere. Así mesmo, pide liberdade vixiada para o acusado durante cinco anos, con posterioridade á pena de prisión, e deberá participar en programas de educación sexual.
Por outra banda, tamén solicita a pena de inhabilitación especial para calquera profesión oficio ou actividade que leve contacto regular e directo con persoas menores de idade por un tempo de dez anos.
Ademais, o acusado deberá de indemnizar á vítima con 3.000 euros polos sufrimentos psicolóxicos xerados e na cantidade que se determine no xuízo oral polos gastos medicofarmacéuticos ou de terapia que os feitos lle obrigasen a efectuar.
